قصة كوثر ـ الحلقة 11 والأخيرة

قصة كوثر ـ الحلقة 11 والأخيرة

(القصة مستمدة من أحداث واقعية)

من بعد ما تعرض راجلي للسحر مشينا عند بعض الفقهة اللي هوما متدينين وكيخافو الله وكيعملو الرقية الشرعية بالقرآن، وبقاو كيعملو لينا الرقية باستمرار، ولكن بلا نتيجة ودازت ثلاث شهور بحال هكذا، وأنا وليت كنقول لراجلي نمشي عندها ونطلبها تفك ليه هاد السحر، وهو ما خلانيش وقال لي وخى نبقى مسحور طول عمري ما نطلبهاش وما نضسرهاش راه ربي كبير، خصوصا أن راجلي كيخاف الله وملتزم دينيا بزاف، وما نكدبش عليكم أنا بداو شي عيالات كيعمرو لي راسي راه كاين شي شوافة كتعمل غير الحاجة المزيانة وراها تفك ليكم السحر، والشيطان اضحك علي ومشيت عند أزيد من 04 منهم، وبلا نتيجة، كانوا كياخذو لي غير رزقي ويضحكو علي بالهضرة الخاوية، وصافي استغفرت الله وقلت اللي كتبها الله هي اللي تكون، حتى لواحد النهار، تلاقى راجلي مع شي واحد ولد الناس غير صدفة في المسجد، وكان أخ ملتزم ومتدين، وبقاو كايهضرو وقال ليه على المشكلة ديالنا، وهو يقول ليه راه كاين شي إمام مسجد في عين السبع كيقولو ليه "عبد الواحد" كيعمل الرقية وأنه ما يخليش السحر، ومينا عندو أنا وراجلي وكان الزحام بزاف وما جاتش فينا النوبة، وفي النهار الثاني مشينا قبل صلاة الفجر، وهو غير كيصلي بالناس الفجر ويبدى يفرق في الأرقام ديال النوبة، وبقينا تما من قبل الفجر وما جاتنا النوبة حتى 12 ديال النهار، الناس جاية عندو من الخارج ومن كاع المدن، واعمل لينا رقية على الثمر وعلى الماء، وقال لينا نعومو بيه ونشربوه وناكلو التمر، ونحافظوا على قراءة البقرة وعلى الصلاة وما نسمعوش للأغاني نهائيا، نسمعو القرآن صافي، وهاداك الشي اللي اعملنا، وسبحان الله في ظرف سبعة أيام تحل الثقاف، واصبح راجلي عادي، واحمدنا الله وشركناه.

المهم باش ما نطولش عليكم، بقى راجلي مسكين كيمشي عند خوتي كل أسبوع وكيحاول يقنعهم وما كيخلي ما يدي معاه ليهم وكيشوفوه متدين بزاف، وشافو الأخلاق ديالو، وكيقول ليهم راه الأقدار هي اللي كتبات على أبوكم وأمكم هادك الشي، ماشي كوثر، وكون ما كانتش كوثر كاع في الدنيا كان باباكم وماماكم غادين يمرضو نفس الأمراض والعمر غادي يسالي في نفس النهار اللي مكتاب ليه، وقال ليهم راكوم ظلمتوها بزاف وتخافو شي نهار لا قدر الله يغبر شي حد منكم انتوما ولا هي ويندم الطرف التاني بزاف، اللهم عتقو الأمر دابا في الحياة، وهي راها كتموت عليكم بزاف.

حتى لواحد النهار كنت في الدار ما علي ما بيا حتى كنسمع الباب تفتح، ودخل راجلي وهو كيضحك وشوية كيبانو لي خوتي كاملين داخلين من وراه، وطرت بالفرحة والبكا والدموع وأنا كنعانق فيهم، وهوما كيطلبو مني السماحة، وفرحو بزاف ملي شافوني لابسة الخمار، وشافوني وليت متدينة بزاف كنحفظ دابا القرآن أنا وبنتي عند واحد الكتاب قرآني في حي بوسيجور بالدار البيضاء، وتحولات حياتي كليا.

أنا كنت كنعرف باللي الله قادر على كلشي، ولكن لكن ما عمرني عرفت بحال دابا أن الرحمة ديال الله ممكن توصل لهاد الدرجة، وأن الإنسان بالقرب من الله ممكن يعيش حياة سعيدة كف عايشة أنا وبنتي دابا وراجلي، ولهذا كنوصيكم كاملين خوتي في الله أنكم تقربو من الله بزاف، والله العظيم حتى مشاكلكم كلها تتحل، اللي كتشكي من راجلها وكتقول ما كيعاملهاش مزيان، واللي كتقول حياتي كلها مشاكل، واللي كيشكي من الفقر ومن الزوجة ديالو ومن الجفاء ديالها، واللي حياتهم كلها مشاكل وصداع ومدابزة وغوات، وكيقولو من صاب شي نهار نعيش بحال الناس في الهنا، كلشي ساهل وكلشي بيد الله خوتي، غير تقربو من الله وحافظو على صلاتكم في الوقت وعلى الفجر، وقيام الليل وصيام الإتنين والخميس، والله حتى تصبح حياتكم حياة أخرى، وتقولو سحان مبدل الأحوال.

النهاية.